专访品酒姊妹花 - Sally & Esther

90後姊妹档品酒搞生意，咩玩法？

初接触 Sally 和 Esther，已经唔难发现佢哋性格迥异。姐姐 Sally 文静内向，说话唔多，一开口围绕佢嘅专业：品酒。妹妹 Esther 外向乐於分享，锺意笑，勇往直前。两个性格完全唔同嘅人一齐搞生意，话冇拗撬，你信唔信？两姊妹一齐做嘢，几点放工都有分歧。返公司对住，返屋企对住，非常容易将公事带返屋企。Esther谂到新嘢即刻敲门同 Sally 讲，Sally 有时已经瞓咗觉，二人就会因此争执。不过一家人边有计，记住「大家都系为公司好」，唔伤感情。

吵吵闹闹跌跌碰碰之中，两姊妹一齐去澳洲挑选值得引入香港嘅葡萄酒。一年去四次，每次去足一个星期，由大清早到下昼5丶6点，每日走匀8个酒庄，每个庄试5丶6支酒。因为要「试真啲」，所以每杯真饮不吐酒，以防酒入喉咙有怪味。Sally 话真系「饮到醉饮到呕」先拣到两个独家代理酒庄，帮佢哋打入大中华区。

睇中酒庄，都唔代表酒庄愿意畀独家代理权。点解拎到两间酒庄独家代理，Sally 认为「机会系留畀有准备嘅人」，出发前做好 Research，集中火力喺Barossa 地区同 Clare Valley 搵酒，最终皇天不负有心人。Esther 就觉得关佢哋「有诚意」丶「不断倾」同埋「轰炸（讯息）」事，4次过澳洲视察发芽丶收割等重要时刻，感动庄主首肯。喺品酒班讲解葡萄酒头头是道嘅 Sally，原来以前滴酒不沾！直到去瑞士读酒店，其中一科讲酒嘅，加上欧洲买酒平靓正，先提起对酒嘅兴趣。之後返嚟香港发现搵抵饮高质酒咁难，所以决定考返个品酒师牌，帮自己帮人谋酒福。