勁揪體 - 信念：自勁揪體眾籌達標後，多媒體設計師 KIT MAN 及其助理團隊花了兩年零三個月，完成製作第一版本六千字符嘅勁揪體。勁揪體除了是一個標題字款，更加係一種信念；於改變不了大環境嘅頹勢之下，就算失望，不能絕望，堅守信念；於自己崗位上做好可做之事！只要七百萬人都有此信念，香港必定會更勁揪！

 

展覽內容

現場會有一個可供真／偽文青打咭、有幾百粒字嘅《原稿展區》，亦有一個睇得又玩得嘅互動投影《文字瀑布》；

重有一個可以比大家瘋狂購物嘅《廢青包養區》（精品區），大家可以購買一系列嘅勁揪體產品包括貼得又玩得嘅海報，可以袋嘢又孭得嘅文字 TOTEBAG，出外旅遊必不可少嘅香港人 HONGKONGER 刺繡襟章⋯⋯

另外有得到 HK Brewcraft 大掌櫃 Warren Yu 加持製作嘅勁揪別注啤酒，展覽更邀請到成衣界鉅子 TOPIX 嘅 Jack Lo 喺發佈會當晚過來同大家即時揀圖案整手刮 TEE；製作一系列勁揪別注產品，目的係展示予用家可以如何使用勁揪體，讓大家將勁揪體及其精神帶入生活之中。

 

賣字

一個最常見嘅問題，係隻字點賣。 勁揪體亦會跟網上嘅字體賣法去發售，分開唔同嘅使用方式去賣出唔同嘅使用權。 使用權將會以一次性收費永久賣斷方式售出。售價將會於官方網頁上公佈。 分別有以下不同之商用授權：

• 一般商用授權，包括印刷品、社交網絡、產品製作
• 網頁製作授權
• 手機程式製作授權

 

創作人 KIT MAN 之感言

「勁揪體嘅旅程，出發至今，四年了，大家還好嗎？？？回想一下，佢同大家一齊熱血沸騰過，同香港人一齊跌過喊過，同香港足球一齊嗌過，同長跑好手一齊跑過，同本土樂隊一齊 ROCK 過，同唔同品牌合作過，同各位一齊過過新年送出過好多有骨氣有種嘅祝福⋯⋯ 2016 年，大家比機會佢去做一個紀錄 6000 粒正體字嘅創舉⋯⋯ 兩年嘅製作時間已經過去，6000 字嘅勁揪體只差最後修正就可以正式面世，兩年以嚟，真的太感激各位嘅支持同信任，重有唔同嘅團體同朋友嘅幫助，勁揪體先可以堅持到今日，呢個唔係終站，而係一個新開始 XD ⋯」

 

勁揪體蚊型展及發佈會

發佈會日期: 2018 年 11 月 30 日（五）
發佈時間: 下午6時 - 晚上10時
展覽日期: 2018 年 12 月 1 - 12 日（五）
展覽時間: 中午12時 - 晚上10時
地點: HOW ／ 香港觀塘巧明街99號巧明工廠大廈3樓AB座
門票：免費入場