專訪品酒姊妹花 - Sally & Esther

90後姊妹檔品酒搞生意，咩玩法？

初接觸 Sally 和 Esther，已經唔難發現佢哋性格迥異。姐姐 Sally 文靜內向，說話唔多，一開口圍繞佢嘅專業：品酒。妹妹 Esther 外向樂於分享，鍾意笑，勇往直前。兩個性格完全唔同嘅人一齊搞生意，話冇拗撬，你信唔信？兩姊妹一齊做嘢，幾點放工都有分歧。返公司對住，返屋企對住，非常容易將公事帶返屋企。Esther諗到新嘢即刻敲門同 Sally 講，Sally 有時已經瞓咗覺，二人就會因此爭執。不過一家人邊有計，記住「大家都係為公司好」，唔傷感情。

吵吵鬧鬧跌跌碰碰之中，兩姊妹一齊去澳洲挑選值得引入香港嘅葡萄酒。一年去四次，每次去足一個星期，由大清早到下晝5、6點，每日走勻8個酒莊，每個莊試5、6支酒。因為要「試真啲」，所以每杯真飲不吐酒，以防酒入喉嚨有怪味。Sally 話真係「飲到醉飲到嘔」先揀到兩個獨家代理酒莊，幫佢哋打入大中華區。

睇中酒莊，都唔代表酒莊願意畀獨家代理權。點解拎到兩間酒莊獨家代理，Sally 認為「機會係留畀有準備嘅人」，出發前做好 Research，集中火力喺Barossa 地區同 Clare Valley 搵酒，最終皇天不負有心人。Esther 就覺得關佢哋「有誠意」、「不斷傾」同埋「轟炸（訊息）」事，4次過澳洲視察發芽、收割等重要時刻，感動莊主首肯。喺品酒班講解葡萄酒頭頭是道嘅 Sally，原來以前滴酒不沾！直到去瑞士讀酒店，其中一科講酒嘅，加上歐洲買酒平靚正，先提起對酒嘅興趣。之後返嚟香港發現搵抵飲高質酒咁難，所以決定考返個品酒師牌，幫自己幫人謀酒福。